काठमाण्डौबाट ४ मोटरसाइलमा रामेछाप आएर एक व्यक्तिमाथि कुटपिट गर्ने ८ जनाको समूह पक्राउ
रामेछाप– काठमाडौँबाट ४ वटा मोटरसाइकलमा आएका ८ जनाको समूहले रामेछापको मन्थलीमा एक व्यक्तिमाथि सांघातिक आक्रमण गरेको छ । जिल्ला प्रहरी कार्यालय रामेछापका अनुसार आइतबार बिहान अन्दाजी ७ बजेको समयमा मन्थली नगरपालिका वडा नं ७ कल्लेरी मानेडाँडा बस्ने ३२ वर्षीय करण बि.क.ले पुरानो रिसइवीका कारण योजना बनाई काठमाडौँबाट मानिसहरू बोलाएर खाँडादेवी गाउँपालिका वडा नं ९ स्कुलडाँडा […]


रामेछाप– काठमाडौँबाट ४ वटा मोटरसाइकलमा आएका ८ जनाको समूहले रामेछापको मन्थलीमा एक व्यक्तिमाथि सांघातिक आक्रमण गरेको छ । जिल्ला प्रहरी कार्यालय रामेछापका अनुसार आइतबार बिहान अन्दाजी ७ बजेको समयमा मन्थली नगरपालिका वडा नं ७ कल्लेरी मानेडाँडा बस्ने ३२ वर्षीय करण बि.क.ले पुरानो रिसइवीका कारण योजना बनाई काठमाडौँबाट मानिसहरू बोलाएर खाँडादेवी गाउँपालिका वडा नं ९ स्कुलडाँडा बस्ने ३५ वर्षीय जीवन बि.क.माथि निर्घात कुटपिट गरेका हुन् । कुटपिटबाट गम्भीर घाइते भई बेहोस भएका जीवन बि.क.लाई तत्काल उद्धार गरी मन्थलीस्थित रामेछाप सामुदायिक अस्पतालमा उपचारका लागि पठाइएको जिल्ला प्रहरी कार्यालय रामेछापका सूचना अधिकारी कमल राउतले बताए ।
घटनालगत्तै खटिएको प्रहरी टोलीले आक्रमणमा संलग्न रामेछाप खाँडादेवी–३ आँपचौरका २५ वर्षीय गोपाल बि.क., खाँडादेवी–२ मझुवाका २० वर्षीय दिपेन्द्र लोहार, खाँडादेवी–१ राकाथुमका ३६ वर्षीय नारायण लोहार, मन्थली–७ कल्लेरीका ३२ वर्षीय करण बि.क. र सोही ठाउँकी २५ वर्षीया विपना खातीलाई पक्राउ गरेको छ । यस्तै सिन्धुलीको सुनकोसी गाउँपालिका–४ डाँगी बस्ने २४ वर्षीय रमन बि.क., ३० वर्षीय रमेश बि.क. र २० वर्षीय चतुरलाल बि.क. पनि पक्राउ परेका छन् ।
पक्राउ परेका सबै व्यक्तिहरू र उनिहरुले प्रयोग गरेका ४ ओटा मोटरसाइकल समेत नियन्त्रणमा लिई ज्यान मार्ने उद्योग कसूरमा थप अनुसन्धान अगाडि बढाइएको सूचना अधिकारी प्रहरी निरीक्षक राउतले बताए ।



